RTI Act hmanga zawhna Chief Minister office SPIO in a chhan danin, Chief Minister hi official function-a a telna, Khuallian a atan tawhna official record a awm chiahlo chungin an hriattheih ang angte a tarlang a, hemi bakah Zoram Today chuan Chief Minister official social media account atanga programme hrang hranga Khuallian a atan tawhna la chhuakin vawi 20 zet khuallian/ khualzahawm ah a tang tawh a, tin, sorkar leh pawl programme thenkhatah Khuallian ang nilova a chet chhuahna tum tamtak a awm thung.

Hetihrualin, Election Commission of India in March 16, 2024 a Lok Sabha inthlanpui a puan ruala Model Code of Conduct a hman avangin March 16 atanga June 6, 2024 thleng kha Chief Minister angin Khuallian ah atang theilo thung a. MCC puan anih chhung hian April ni 5, 2024 a ZPM Serchhip Block in Political training an neihna ah chiah Khuallian ah atang a ni. June ni 6, 2024 hnu lamah vawi 5 khuallian ah atang tawh.

Chief Minister a nih hnua chanchinbu mite hmaa press conference a neih hmasak ber ah CM Lalduhoma chuan, ZPM kaihhruai sorkar tharah Khuallian a tan zut an tumloh thu a lo sawi tawh a ni.

"Chief Guest ah tan zut kan tum lo, thil tenau thlenga Chief Guest a min sawmlo turin mipuite pawh kan ngen che u a ni," a ti a. "Kan officer ten lo hawng ve rawhse, lo ti ve rawhse. Tlem a Minister chin in han hawn âwm hi chu a awm mai," a ti a ni.